Bata nilamon ng ilog

MANILA, Philippines - Isang 12-anyos na lalaki ang iniulat na nasawi habang nakaligtas naman ang kaibigan nito matapos tangayin ng malakas na agos sa ilog sa bayan ng Liloan, Cebu noong Huwebes ng hapon.

Kinilala ang biktima na si Daryl Yuson  at ang nai­ligtas naman ay si Nestor Jocutmaya.

Base sa police report na nakarating sa Camp Crame, bandang alas-3 ng hapon noong Huwebes nang tuma­wid sa ilog ang magkaibigan sa Barangay Cabadiangan.

Nabatid na ang mga bata ay nagprapraktis ng sayaw sa Barangay Muyao­ nang maisipang magtungo sa ilog sa kanugnog na barangay para ma­nguha ng kawayan na ga­gamitin sanang drummers sa kanilang paglahok sa Rosquillos Festival ngayon.

Ayon sa imbestiga­syon, sina Yuson at Jocutmaya ay lumangoy sa ilog habang nasa pampang naman ang kanilang mga kasamahan.

Dito na tinangay ng agos at nilamon ang biktima kung saan nagawa namang mailigtas ng kanilang mga kasamahan si Jocutmaya.

Ang bangkay ni Yuson ay narekober naman noong Biyernes matapos lumutang sa ilog.