4 todas sa SCTex road mishap
MANILA, Philippines - Apat-katao kabilang ang isang doktor ang iniulat na nasawi habang apat iba pa ang grabeng nasugatan makaraang sumalpok ang kanilang sasakyan sa railings ng Subic –Clark-Tarlac Expressway sa bayan ng Porac, Pampanga noong Martes ng hapon.
Kinilala naman ni PNP-Highway Patrol Group director P/Chief Supt. Leonardo Espina ang mga nasawi na sina Dr. Richard Quilang, 43, ng Tondo; Charlotte Rivera, John Mallari, at si Mariel Ocampo.
Naisugod naman sa Bataan Peninsula Medical Center ang mga sugatang sina Joyce Quilang, Rensie Ann Sabangan, Marie Joy Quilang, at si Marian Jill Quilang.
Lumilitaw na sumabog ang unahang gulong ng Ford Expedition (XKW985) na minamaneho ni Dr. Quilang sa southbound lane kaya nawalan ng kontrol at sumalpok sa konkretong railings ng SCTex kung saan tatlong beses na bumaliktad ang sasakyan.
Humagis ang katawan ng mga biktima palabas ng sasakyan kaya apat sa mga biktima ang nasawi habang apat pang iba ang malubha ang kalagayan.
- Latest
- Trending
