Anak minartilyo ng ama, utas

LAGUNA, Philippines – Brutal na kamatayan ang sinapit ng 36-anyos na lalaki makaraang martilyuhin sa ulo ay sinaksak pa ng sariling ama sa loob ng kanilang bahay sa #362 Purok 1, Barangay San Vicente sa Biñan City, Laguna noong Lunes ng madaling araw.

Ayon kay P/Supt. Leonard L. Luna, hepe ng pulisya, nakilala ang suspek sa pangalang Maximo Zarate, 64, samantalang ang biktima naman na anak nito ay si Reynaldo Zarate, 36, Kapwa karpintero.

Bandang ala-1:40 ng madaling araw nang planuhing patayin ng suspek ang sariling anak habang natutulog sa loob ng sarili nilang tahanan.

Lumitaw na minartilyo ni Maximo ang sariling anak habang natutulog pagkatapos na mawalan ng lakas ng katawan ay sabay naman nitong inundayan ng saksak sa ilang bahagi ng katawan.

Napag-alaman ng pulisya na selos ang sinasabing motibo ng suspek kaya walang awang pinatay ang sariling anak.

Sa impormasyong nakalap ng pulisya, lumalabas na may matagal na umanong alitan ang mag-ama dahil sa madalas na pagbibiro ng hindi maganda ng biktima sa ka-live-in partner ng kanyang ama.