Mayor kinidnap ng MILF rebs
MANILA, Philippines - Dinukot ng mga armadong kalalakihan na nagpanggap na mga pulis ang alkalde sa bayan ng Salug, Zamboanga del Norte noong Lunes ng gabi.
Kinilala ni Directorate for Integrated Police Operations – Western Mindanao Chief P/Director Felicisimo Khu ang biktima na si Mayor Jeffrey Lim ng nabanggit na bayan.
Kasalukuyan namang iniimbestigahan kung may kinalaman ang mga bandidong Abu Sayyaf Group at grupo ng Moro Islamic Liberation Front rouge elements sa pagdukot sa alkalde, ayon pa sa mga opisyal ng PNP at AFP.
Lumilitaw na nagpanggap ang mga kidnaper na mga pulis na may papipirmahang dokumento sa alkalde kung saan dinisarmahan ang dalawang security escort nito na walang nagawa matapos makorner sa Salug Bus Terminal sa Barangay Poblacion bandang alas-7:19 ng gabi.
Isinakay ang biktima sa dilaw na multicab van (811) bago binagtas ang daan sa direksyon ng Barangay Caracol.
Gayon pa man, ilang oras matapos dukutin ang biktima ay natagpuan ang getaway vehicle sa masukal na bahagi ng Barangay Caracol na sinunog ng mga kidnaper.
Samantalang bumuo na rin ng Crisis Management Committee kasabay na inilatag ang search and rescue operations ng pinagsanib na elemento ng pulisya at militar.
- Latest
- Trending
