2 coed utas sa killer van

CABANATUAN CITY, Nueva Ecija, Philippines – Dalawang college student ang iniulat na nasawi habang isa pa ang malubhang nasugatan makaraang salpukin ang kanilang motorsiklo ng van sa Maharlika Highway, Barangay Bangad sa Cabanatuan City, Nueva Ecija, kamakalawa ng gabi. Kinilala ng pulisya ang mga nasawing sina Carl Joseph Sibolboro, 17; at Jamill John Lauz, 21, kapwa nakatira sa Barangay Camp Tinio sa nasabing lungsod. Naisugod naman sa Good Samaritan Hospital ang sugatang si Aaron Garcia. Lumilitaw na magka-convoy ang mga motorsiklo ng mga biktima sa hangganan ng Barangay Bangad at Barangay Lourdes nang salpukin ng puting Nissan Urvan (PBI-141) ang motorsiklo ng tatlong estudyante. Ayon sa pulisya, hindi naman huminto ang van subalit nakuha naman ang numero ng plaka kaya kasalukuyang bineberipika sa kinauukulang ahensya ng pamahalaan.