3 nilamon ng tubig-baha

MANILA, Philippines - Tatlo-katao ang iniulat na nasawi matapos malunod sa tubig-baha sa pagragasa ng flashflood dulot ng patuloy na buhos ng ulan sa magkakahiwalay na lugar, ayon sa ulat ng National Disaster Risk Reduction Ma­nagement Council kahapon. Kabilang sa mga nasawi ay sina Renato Moslares, 30; Ismael Montallano, 52, na tinangay ng tubig-baha matapos na umapaw ang ilog sa bayan ng Oras, Eastern Samar. Maging si Isidro Reyes, 41, ay nilamon ng tubig-baha matapos na umapaw ang ilog sa bayan ng Virac, Catanduanes. Samantala, sa Oriental Mindoro ay humupa na ang tubig-baha sa Calapan City, Baco, Bansud, Mansalay, Naujan, Gloria, Puerto Galera, San Teodoro at sa bayan ng Pola kung saan hindi naman madaanan ang Calapan North Road dahil sa landslides.