Rookie cop todas sa road mishap
MANILA, Philippines - Patay ang isang bagitong pulis samantalang dalawa pa nitong kasamahan ang grabeng nasugatan makaraang aksidenteng bumangga ang behikulong sinasakyan ng mga ito sa isang nakaparadang truck sa national highway ng Brgy. Aliguasan III, Ilagan, Isabela kahapon ng madaling-araw.
Kinilala ni Police Regional Office (PRO) 2 Director P/Chief Supt. Rodrigo de Gracia ang nasawing biktima na si PO1 Crisanto Sadorra Jr., dead-on-arrival sa Gov. Faustino Dy Memorial Hospital sa nasabing bayan.
Patuloy namang nilalapatan ng lunas sa pagamutan ang mga kasamahan nitong sina Chief Inspector Roman Ranon at PO1 Paul Ramos; pawang ng Regional Public Safety Battalion (RPSB).
Base sa imbestigasyon, sinabi ni de Gracia, bandang alas-4:30 ng madaling-araw habang lulan ang tatlong pulis ng Mitsubishi Pajero (XFD 598) na minamaneho ni Ranon ng aksidente itong bumangga sa nakaparadang Isuzu forward truck (ZRA -949) sa national highway ng nasabing lugar.
Hindi umano napansin ng driver ang nakabalandrang truck dahilan wala itong ‘warning signal at nagkataong madilim pa sa lugar na nagbunsod sa malagim na sakuna.
Isinasailalim pa ng mga awtoridad sa masusing imbestigasyon ang kasong ito.
- Latest
- Trending
