Holdap: Negosyanteng misis todas, mister grabe

MANILA, Philippines - Napatay ang isang negosyanteng misis habang nasa kritikal namang kon­disyon ang mister nito matapos na pagbabarilin nang pumalag sa dalawang holdaper sa Butuan City, Agusan del Norte noong Biyernes ng gabi.

Base sa ulat ni Caraga PNP spokesman P/Se­nior Supt. Martin Gamba, idineklarang patay sa MJ Santos Hospital si Margie Cator, 46, habang isinasalba naman ang buhay ng kanyang mister na si Lucio Cator, 45, kapwa nakatira sa Emilia Compound sa Barangay 23, Holy Redeemer sa nasa­bing lungsod.

Sa imbestigasyon, dakong alas-7 ng gabi ng maganap ang insidente sa harapan ng tahanan ng mag-asawa.

Lumilitaw na tinyempuhan ang mag-asawa na papasok sa kanilang gate ng kanilang tahanan nang lapitan at holdapin ng motorcycle-riding gunmen.

Gayon pa man, nanlaban ang misis na tumangging ibigay ang dala nitong bag na naglalaman ng malaking halaga kung saan ay hinablot pa nito ang bonnet ng isa sa holdaper.

Dahil dito ay nairita at pinagbabaril ang mag-asawa saka mabilis na tumakas.