Driver ng konsehal naghuramentado

MANILA, Philippines - Tatlo-katao kabilang ang isang 4-anyos na bata ang iniulat na nasugatan matapos na mamaril ang naghuramentadong lalaki sa Zamboanga City noong Biyernes ng gabi. Kabilang sa mga sugatan ay ang mag-utol na Roderick Cuartocruz at Marlon Cuartocrux, at ang apat na taong gulang na pamangking lalaki na hindi natukoy ang pagkakakilanlan.

Arestado naman ang suspek na si Roque Cadiz, driver ni Zamboanga City Councilor Jimmy Cabato.

Sa ulat na nakarating sa Camp Crame, bandang alas-7 ng gabi nang sumulpot sa tahanan ng mga Cuartocruz ang suspek sa Brgy. Jose Guzu at hinahanap ang lalaking sumaksak sa kaniyang kapatid.

Naghihinala ang suspek na isa sa miyembro ng pamilya Cuartocruz ang nasa likod ng pagkamatay ng kaniyang nasaksak na kapatid.

Kasalukuyan namang nasa bisinidad ng nasa­bing lugar ang ilang pulis na narinig ang mga putok ng baril kaya mabilis na nagresponde at nasakote ang suspek.