Kuya tinodas ng 2 kapatid

CAMP SIMEON OLA, Philippines  — Dahil sa alitan sa lupa na minana pa nila sa kanilang mga magulang, isang nakakatandang kapatid ang pinagbababaril ng kanyang dalawang nakakabatang kapatid habang kumakain ng hapunan kamakalawa ng gabi sa Sitio Bongalon, Brgy. Divisoria, Cawayan, Masbate. Hindi na umabot pa ng buhay sa Masbate Provincial Hospital ang biktimang si Cerelo Gomez, 49, biyudo, isang manggagawa at residente ng naturang lugar. Samantala ang dalawang suspek na agad na tumakas ay kinilalang sina Edgar Gomez at Bernie Gomez, pawang may mga asawa, magsasaka at mga residente ng naturang lugar. Bandang alas-7 ng gabi ng mangyari ang insidente sa bahay ng bayaw ng magkakapatid sa naturang lugar. Lumilitaw naman sa imbestigasyon na alitan sa lupa ang motibo ng krimen.