Snatcher todas sa shootout

QUEZON, Philippines – Isa sa tatlong suspek sa cell phone snatching ang iniulat na napatay habang nakatakas naman ang dalawang iba pa matapos na makipagbarilan sa mga operatiba ng pulisya sa Barangay Ibabang Dupay, Lucena City, Quezon noong Sabado ng madaling-araw.

Bineberipika ng mga operatiba ng Scene of the Crime Operations (SOCO) ang pagkakakilanlan ng napatay habang tugis naman ng mga tauhan ni P/ Supt.Ramon Balauag ang dalawang suspek.

Sa ulat nina SPO2 Paul Pelaez at PO2 Miljun Magadia, dakong alas-10 ng gabi nang lapitan at agawan ng cell phone ang magpinsang sina Ferdinand Gutierrez at Michael Andrew Gutierrez habang sila ay nakatayo sa tapat ng Silangang Mayao Elemantary School.

Kaagad naman inilatag ang operasyon kung saan namataan ang tatlong suspek na lulan ng traysikel hanggang sa magkahabulan na nauwi sa shootout sa bahagi ng Maharlika Highway sa nasabing barangay.

Ayon sa pulisya, ang tatlo ay responsable sa serye ng holdapan sa Lucena City na ang binibiktima ay mga estudyante.