Jeepney tumaob: driver patay; 8 pa sugatan
CAVITE ,Philippines —Binawian ng buhay noon din ang isang driver habang malubha namang nasugatan ang walo nitong pasahero makaraang aksidenteng tumaob ang minamaneho nitong jeepney nang tangkaing iwasan ang poste ng kuryente sa kahabaan ng Molino Road, Bacoor, Cavite kamakalawa.
Sa ulat ni Supt. Edgar Roquero, hepe ng Bacoor Police, kinilala ang nasawi na si Leopoldo Balindan, 50-anyos, driver ng Baclaran, Parañaque City.
Patuloy namang nilalapatan ng lunas sa pagamutan ang mga sugatang biktima sina Josephine Atienza, 71; Berlito Mendoza, 65; Charisse Grace Guevarra, 26; Christine Gumata, 28; Clyde Dwight Gumara; Katrina Beatingo, 16-anyos at dalawang iba pa.
Ayon kay PO2 Edison Petalcurion, may hawak ng kaso dakong alas-6:30 ng umaga habang binabaybay ng pampasaherong jeepney (PVZ-179) ang kahabaan ng Molino Road sakay ang mga biktima ng maganap ang sakuna.
Kasalukuyang papatawid sa crossing ng Molino Road ang jeepney nang mawalan ng preno ang jeepney na aktong sasalpok sana sa poste ng kuryente na iniwasan ng driver bunsod upang tumaob ito.
Nagawa pang lumundag ng driver pero bago pa man makatayo ay nadaganan ng bumaligtad na jeepney na siya nitong agarang ikinasawi.
- Latest
- Trending
