Binihag na nurse, laya na

MANILA, Philippines -  Matapos ang 2-buwang pagkakabihag, pinalaya na ng mga bandidong Abu Sayyaf ang kinidnap na nurse noong Lunes ng gabi sa Barangay Timbang-Timbang sa bayan ng Alicia, Zamboanga Sibugay.

Si Maria Criss Sugradiel Cuartocruz ay itinurn-over ng mga kidnaper sa kaniyang ina sa pasado alas-7 ng gabi kung saan inaalam ng mga tauhan ni P/Senior Supt. Edwin de Ocampo, kung nagbayad ng ransom ang pamilya.

Nabatid na nasa maa­yos namang kalagayan si Cuartocruz matapos sumailalim sa medical check-up.

Sa tala ng pulisya, si Cuatrocruz ay kinidnap noong Disyembre 14, 2010 sa Brgy. Manicahan, Zamboanga City.

Sa nasabing insidente ay napatay ang lolo ng biktima na si Jesus Cuartocruz matapos na pagbabarilin ng mga kidnaper dahil sa pagsaklolo sa kanyang apo.