Jolo bombers nag-ala spider man

MANILA, Philippines –  Mistulang nag-ala spider man ang mga Jolo bombers na matapos ang mga itong umakyat sa pader at magpatalun-talon sa bubungan saka inihagis ang bomba sa bubungan ng Sacred Heart Church sa Sulu na ikinasugat ng 11 katao kabilang ang isang pari noong Pasko, ayon sa opisyal ng militar. Sa pagpapatuloy ng imbestigasyon, sinabi ni AFP-Western Mindanao Command (AFP-Westmincom) spokesman Lt. Col. Randolph Cabangbang, nakatanggap sila ng impormasyon na umakyat pa sa bubungan ang mga sangkot sa pambobomba. Ang bomba, ayon sa opisyal ay inihagis ng mga suspek dakong alas-7:15 ng umaga sa kasagsagan ng misa para sa pasko na ikinasugat ni Fr. Rick Baculcol at ng 10 pang sibilyan. Ang naturang simbahan ay nasa loob mismo ng Camp Asturias sa Jolo, Sulu. Sa kabila naman ng intelligence report na may mga grupo ng Abu Sayyaf na kinabibilangan nina Said Sali na magpapasabog sa simbahan, sinabi ni PNP Spokesman Chief Supt. Agrimero Cruz Jr. na blanko pa rin ang mga awtoridad sa may kinalaman sa pagpapasabog.