10-anyos tinodas ng amang adik

CAMP VICENTE LIM, Laguna, Philippines  — Pinaniniwa­laang naburyong dahil sa bawal na droga ang isang amang naging overseas Filipino worker (OFW) sa Japan matapos nitong pagsasaksakin hanggang sa mapatay ang kaniyang 10-anyos na anak na lalaki sa bayan ng Tiaong, Que­zon kamakalawa.

Batay sa ulat, kinilala ang napatay na bata na si Daniel Carlo Sulla, Grade 5 pupil sa Grabsum School Inc. sa bayan ng Cande­laria, Quezon.

Nahaharap sa kasong parricide ang ama na si Danilo Umali y Torres, 38, ng Barangay Lagalag sa bayan ng Tiaong, Quezon.

Nabatid na itinigil ang sustento sa bata ng kan­yang ina na nasa Japan kaya nagbunsod para pa­tayin ng suspek ang kan­yang anak.

Sinasabing nag-Japan ang mag-asawang Umali subalit pinauwi ang lalaki dahil sa pagkalulon sa ba­wal na droga.

Bandang alas-4:30 ng madaling-araw nang maka­tanggap ng tawag sa tele­pono ang pulisya hinggil sa pananaksak ng ama sa sariling anak.

Natagpuan ng pulisya ang bangkay ng bata na nakahiga sa kama at tadtad ng mga saksak sa iba’t ibang bahagi ng katawan.

Sa salaysay ng ina ni Danilo na si Rufina Umali, naalimpungatan siya sa pumapalahaw na iyak ng kanyang apo na sumisigaw ng saklolo.

Pinakahuling katagang narinig ng matanda ay - si Daddy naman sinasak­sak ako, bago nalagutan ng hininga ang bata.

Bumungad sa matanda ang nakahandusay na ka­tawan ng apo habang ha­wak naman ng suspek ang kutsilyong ginamit sa krimen.

Kusang loob naman sumama sa pulisya ang suspek na nanlulumo sa nagawang krimen.