Trak vs van: 6 todas
BAYOMBONG, Nueva Vizcaya, Philippines – Anim-katao ang kumpirmadong nasawi habang isa naman ang malubhang nasugatan matapos sumalpok ang van sa sinusundan nitong ten-wheeler truck sa bayan ng Alcala, Cagayan kahapon ng madaling-araw.
Apat sa mga nasawi ay nakilalang sina Salvador Doniego, Benedicto De Leon, Ileen Robles at isang tinukoy sa pangalang Felipe.
Isinasalba naman sa Cagayan Valley Medical Center si Randy Batobalanos na nasa kritikal na kalagayan.
Ayon kay SPO2 Alvino Sorita, dakong alas-3 ng madaling-araw nang maganap ang sakuna matapos pumailalim ang Starex van ng mga biktima sa sinusundang ten-wheeler truck sa kahabaan ng highway sa Brgy. Piggatan.
Lumalabas sa imbestigasyon na nagmula ang mga biktima sa Maynila at patungo sana sa bayan ng Gonzaga na may 14-oras ang layo ng biyahe nang makasalubong si kamatayan.
Pinaniniwalaang nakaidlip sa pagmamaneho ang drayber ng van dahil sa mahabang oras na biyahe kaya naganap ang trahedya.
Nasa pangangalaga naman ng pulisya ang driver ng truck na si Florentino Felipe matapos sumuko.
- Latest
- Trending
