5 pisak sa killer truck
RIZAL , Philippines — Luksang Pasko ang sumalubong sa lima-katao kabilang ang isang buntis na babae makaraang araruhin ng dump truck sa imbakan ng basura, kahapon ng hapon sa bayan ng Rodriguez, Rizal.
Isinugod pa sa Amang Rodriguez Medical Center ang mga biktimang idineklarang patay kung saan ang isa ay nakilala sa pamamagitan ng suot niyang identification card na si Gina Arisga, 40, buntis, ng Sitio Tanag, Barangay San Isidro, ng nabanggit na bayan.
Pormal naman kakasuhan habang nakapiit ang drayber na si Danilo Sukaldito, 53, ng Novaliches, Quezon City.
Sa ulat na nakarating sa Rizal Police Provincial Office, naganap ang sakuna dakong ala-una ng hapon sa Montalban Landfill sa bisinidad ng Sitio Lukutang Maliit, Brgy. San Isidro.
Abalang nangongolekta ng maibebentang basura ang mga biktima nang araruhin sila ng dump truck (CNY-502) na minamaneho ni Sukaldito.
Nakaiwas naman sa naturang trak ang iba pang basurero subalit minalas ang limang biktima.
Sa presinto, inamin ni Sukaldito na nawalan siya ng kontrol nang mawalan ito ng preno at nagtuluy-tuloy sa mga biktima.
- Latest
- Trending
