DENR executive itinumba
MANILA, Philippines - Isang opisyal ng Department of Environment and Natural Resources ang binaril nang malapitan hanggang mapatay ng dalawang hindi pa nakikilalang armadong tao sa loob ng isang restawran sa Mati, Davao Oriental kamakalawa.
Nakilala ang biktima na si Eulogio ‘Yul Baltic’ Baltazar, Officer-in-Charge ng DENR sa Davao Oriental at retiradong kasapi ng binuwag na Philippine Constabulary.
Kumakain si Baltazar, isa niyang anak na babae at kanyang staff at driver sa Honey’s Restaurant sa Barangay Matiao, Mati nang biglang sumulpot ang mga salarin.
Agad na nilapitan ng dalawang armadong lalaki ang biktima at pinaputukan ito ng sunud-sunod habang nagpulasan naman ng takbo sa matinding takot ang iba pang mga kustomer sa restaurant.
Hindi naman sinaktan ng mga suspek ang anak, staff at ang driver ng biktima na halos na-shock sa pangyayari.
Mabilis na tumakas ang mga salarin lulan ng pulang Honda motorcycle XR200 habang si Baltazar ay isinugod sa pagamutan subali’t nabigo ng maisalba pa ang buhay nito.
Naghihinala naman ang pamilya at mga kaibigan ng opisyal na may kinalaman sa pagsusulong ng biktima sa kampanya kontra illegal logging ang krimen.
- Latest
- Trending
