Testigo sa Dacer-Corbito slay tinodas

MANILA, Philippines - Kinondena ng Department of Justice ang pagpa­tay sa isa sa mga testigo sa Da­cer-Corbito double murder case matapos na pagba­ba­rilin ng mga ’di kilalang sus­pek sakay ng motorsiklo ka­ha­pon ng umaga sa Cavite City.

Ayon kay Justice Under­secretary Ricardo Blan­caflor, nagsisimula ng kumi­los ang kalabang panig dito para mapigilan ang naka­takdang pagbubukas ng kaso kaya pinatahimik at pinatay ang testigong si Jimmy Lopez.

Si Lopez, kapatid nitong si William at si Alex Diloy ang tumatayong testigo   ng pro­secution kung saan sinugod at pinagbabaril ang una sa inuupahang bahay nito sa Cavite ng ilang ’di kilalang ar­madong suspek.

Nakatakdang humarap si Lopez kasama ang dala­wa pang nabanggit na witness ngayong araw sa Ma­nila Regional Trial Court at sa pre­liminary investigation sa Department of Justice, kung saan sa bagong rek­lamo ay idinadawit sina da­ting pa­ngulong Joseph Es­trada at Senador Panfilo Lacson na siyang mastermind sa kaso.

Isinampa ng pamilya Da­cer ang naturang kaso la­ban kay Lacson sa DoJ at ito ay ibinatay sa affidavit ni dating Supt. Cesar Mancao na nagsabing nadinig niya si dating Supt. Michael Ray Aquino na kausap sa tele­pono si Lacson na noon ay hepe ng Philippine National Police (PNP) at inuutusan nito si Aquino na likidahin ang isang alyas Delta.

Tiniyak naman ni Blan­caflor na bagama’t patay na si Lopez ay hindi hihina ang kaso dahil marami pa rin li­litaw na testigo at mag­bibi­gay ng impormasyon sa kaso.

Magugunita na pinaslang ang PR man na si Salvador “Bubby” Dacer at driver nitong si Emmanuel Corbito noong November 2000 sa Indang, Cavite kung saan sunog na ng matagpuan ang bangkay ng mga ito. (May ulat ni Arnell Ozaeta)