Haponesa nalasog sa propeller

MANILA, Philippines – Nauwi sa trahedya ang masayang bakasyon ng mga turistang Haponesa makaraang isa sa kanila ang mahagip ng propeller ng bangkang-de-motor ang halos madurog ang ulo habang nagsasagawa ng scuba diving sa karagatan ng Lapu-Lapu City, Cebu kamakalawa.

Idineklarang patay sa Mactan Doctors Hospital si Etsuko Kosaka, 52, may-asawa, ng  Ishikawa, Japan.

Sa police report na naka­rating sa Camp Crame, lumi­litaw na naganap ang insi­dente sa karagatan ng Cebu Marine Beach Resort sa Brgy. Suba Basbas bandang alas-12:20 ng tanghali. 

Ayon sa ulat, nagdi-diving ang biktima nang aksi­denteng mahagip ang ulo nito ng propeller ng bang­kang dumaan sa lugar na pag-aari ni Antonio Cahilig, 20, ng Brgy. Manibago.

Boluntaryo namang sumuko sa pulisya ang may-ari ng bangka na siya mismo ang nagpapaandar nang mahagip ang biktima. - Joy Cantos