Kolumnista binantaan ng mayor

CAMP VICENTE LIM, Laguna, Philippines – Nala­la­gay ngayon sa panga­nib ang buhay ng isang kolumnista-reporter ng national newspaper ma­karaang pagban­taan at murahin ng isang mayor sa Laguna kahapon dahil sa demolisyon ng kaba­ha­yan sa Baran­gay Lewin.

Ayon kay Paul M. Gutierrez, reporter-columnist ng People’s Tonight, papunta na siya ng Tanay, Rizal nang makatanggap ng tawag mula kay Lum­ban Ma­yor Freddie Paraiso at pagsabihan ng gago at tarantado.

Nag-ugat ang hid­waan ni Gutierrez at Paraiso habang nag­ko­ko­ber ang reporter sa nagaganap na tens­yon sa pagitan ng mga re­sidente ng Barangay Lewin at ilang opisyal ng lokal na pamaha­laan ng Lumban dahil sa napipintong demo­lisyon.

Para makuha ang panig ng mayor kaug­nay sa nalalapit na demolisyon, tinawagan ni Gutierrez, si Mayor Paraiso sa cell phone.

Ayon kay Gutierrez, sinabi sa kanya ni Ma­yor Paraiso na wala na siyang magagawa sa demolisyon dahil may court order na ito, na siya namang inulit ni Gutierrez sa mga nag-aalmang resi­dente.

Dahil dito, nag-al­bu­ruto at nagalit si Ma­yor Paraiso kay Gutier­rez sabay sabi umano ng - “Putang ina mo, huwag kang pupunta dito (Lumban), may pag­lalagyan ka, ginu­gulo mo kami!”

Mariin namang iti­nanggi ni Mayor Pa­raiso na minura niya si Gutierrez at ang tangi niyang sinabi ay “wala na akong magagawa kasi may court order… unless may intervention… but we are exerting all efforts… magbi­bigay din kami ng financial assistance (sa mga apektadong resi­dente),”

Sinabihan din niya si Gutierrez na huwag nang makialam sa ka­nilang problema dahil lalo lamang daw itong nakakagulo sa sit­wasyon. (Arnell Ozaeta)