Mag-amang NPA arestado

Bumagsak sa mga ka­may ng militar ang mag-amang opisyal ng mga rebeldeng New People’s Army sa isinagawang ope­rasyon sa bahagi ng Purok 3 sa Brgy. Cogon, J.P Laurel Avenue, Panabo City sa Davao del Norte, kamaka­lawa ng madaling-araw.

Kinilala ni AFP-Eastern Mindanao Command Major Randolph Cabangbang, ang dalawang lider ng re­belde na sina Reginaldo Ali­caba, 51; at Rizalyn Ali­caba Mangilimotan, 26.

Si Reginaldo na guma­gamit ng alyas Ka Emong at Alex ay deputy secretary ng Armando Dumandan Command ng Southern Mindanao Regional Committee 33, samantalang si Rizalyn na gumagamit ng alyas Ka Taling at bayaw ni NPA leader na si Leonardo Pitao alyas Kumander Pa­rago ay medical officer ng nabanggit na command.

Nasamsam sa mag-ama ang dalawang grana­da, baril at ilang subersi­bong dokumento.

Kasalukuyang isinasa­ila­lim sa medical examination si  Ka Emong matapos na madiskubreng may pros­tate enlargement at patuloy naman ang tactical interrogation. (Joy Cantos)