P7M kabayo ng solon sinaksak

CAMP VICENTE LIM, Laguna – Dalawang hi­nete ang kalaboso maka­raang pagsasaksakin ang 11-kabayong pangarera na nagkakahalaga ng P7 mil­yon at pag-aari ni Tarlac 3rd District Representative Jeci Lapus habang nasa loob ng kwadra sa bayan ng Carmona, Cavite noong Linggo ng madaling-araw.

Kinilala ni P/Senior Supt. Hernando Zafra, Cavite police director ang mga suspek na sina Melvin Villegas, 28, tubong Ba­suaga, Palawan at Arvin Capati ng Guagua, Pam­panga, kapwa stay-in racehorse jockey ng San La­zaro Leisure Park (SLLP) sa Barangay Lantic ng nabanggit na bayan.

Ayon sa report, ban­dang alas-4 ng madaling-araw nang magising ang caretaker na si Nida Da­canay sa ingay ng mga kabayo at laking gulat nalang nito nang makita na ang kabayong si “Serious Susie” ay may na­katarak na kutsilyo sa ulo bandang alas-4 ng uma­ga.

Nang magsiyasat pa si Dacanay, napag-alaman pa nito na sampu pa sa mga alagang mamahaling kabayo ang may mga sak­sak sa ibat-ibang bahagi ng katawan na kinilalang sina Grey Magic, Red Lotus; Karma and Gondor General Onay, Harod’s Magic, Mountain Cat and Liver Action.

Mabilis namang nada­kip sina Villegas at Capati, samantalang tinutugis na­man ang iba pang suspek kabilang na si Rolando “Longlong” Paja Entino, 28, tubong Abuyog, Leyte.

Sa imbestigasyon ng pulisya, posibleng nag-ugat ang pananaksak sa mga kabayo sa naging awayan ng mga caretaker ni Rep. Lapus at sa mga hinete nito. (Arnell Ozaeta at Cristina Timbang)