3 holdaper todas sa pakikipagbarilan

Camp Vicente Lim, Laguna – Nagwakas na ang kasamaan ng tatlong hinihi­nalang holdaper ma­tapos silang mapatay sa pakiki­pag­barilan sa mga pulis sa Sta. Rosa City, Laguna kahapon ng mada­ling-araw.

Kinilala ni Superintendent Primitivo Tabujara, Police Re­gional Intelligence Division chief, ang dalawa sa tatlong suspek na napa­ tay sa pa­ma­ma­gitan ng identification cards na nakuha sa kanilang mga bulsa na sina Roman Du­tosme at Leo­degario Per­mejo, pawang residente ng Area Gate 3 Parola, Tondo samantalang nananatiling unidentified pa rin ang pa­ngatlong suspek.

Ayon sa report, armado ng calibre 38 baril, hinoldap umano ng mga suspek ang isang sangay ng Flying V Gas Station sa Barangay Balibago at tinangay ang hindi pa malamang halaga ng pera bandang alas-3:30 ng madaling-araw at tu­makas sakay ng isang tricycle.

Matapos ang holdap, mabilis namang ipinaalam ng mga empleyado ng Flying V ang nangyari sa him­pilan ng pulisya na nagbun­sod para magsa­gawa ng hot pursuit at dragnet operation ang mga tauhan ng Region 4 Intelligence Group at Sta. Rosa police laban sa mga sus­pek

Makaraan ang isang oras, namataan ng mga awtoridad ang mga suspek sa may Mariquita Subdivision sakop ng Barangay Dita na sa halip na huminto ay nakipagba­rilan pa sila sa mga pulis na naging da­hilan ng kanilang kama­tayan.

Narekober mula sa mga suspek ang tatlong pira­song caliber 38 pistol, sa­lapi na hindi pa malaman ang ha­laga habang isinu­su­lat ito at ang ginamit na tricycle.

Ang bangkay ng mga suspek ay positibong ki­nilala ng mga empleyado ng Flying V.