3 anak pinatungga ng asido

CAMP VICENTE LIM, Laguna – Pinaniniwalaang kahirapan sa buhay ang isa sa motibo kaya nagdesis­yong isama sa hukay ng ina ang kanyang tatlong anak makaraang painumin nito ng asido ang tatlo sa loob ng kanilang tahanan sa Ba­rangay Salasad, Magda­lena, Laguna kahapon ng madaling-araw.

Kinilala ni P/Senior Supt. Manulito Labador, Laguna provincial director, ang ina na si Janette Ponce, 32; at ang kanyang mga anak na sina Marjorie, 4; Margarette, 3; at MJ, 2.

Sa police report, natutu­log na ang tatlong bata nang gisingin ni Janette at sa­pi­litang painumin ng asido sa kutsarita bago uminom din ito para sabay-sabay na wa­kasan ang kanilang buhay bandang alauna ng mada­ling-araw. 

Sa panayam kay P/Senior Insp. Raul Sandoval, hepe ng Magdalena PNP, na­diskubre ng kapatid ni Jenette na si Gina nang da­la­win nito ang mag-iina at lumantad ang matitigas na bangkay ng mga bata.

Sinikap pang isugod nina Gina at Barangay Captain Aniano Laso, ang naghihi­ngalong si Janette at ang tat­long anak sa Laguna Provincial Hospital pero idinekla­rang patay.

Nakaligtas naman ang panganay na anak ni Ja­nette na si Mark Genesis, 8, nang matulog ito sa bahay ng kanyang lola na katabing bahay lang ng pamilya Ponce.

Nag-iwan ng sucide note si Janette sa kanyang mga kaanak na nagsasabing patawarin siya sa nagawang krimen at alagaan ang kan­yang naiwang anak na si Mark.

Napag-alamang kadala­sang lugaw lamang at noodles ang pinagsasa­luhan ng pamilya Ponce at maraming pagkakataong nag-iiyakan ang magkaka­patid hanggang sa maka­tulog sa matinding gutom.

Ayon sa ilang kapitbahay, nitong nakalipas na mga araw ay madalas nakatulala si Janette na sinasabing hindi na makakayang makita na nagugutom ang kaniyang mga anak at sumusuko na siya sa problemang pinan­syal.

Ipinaalam na rin sa ka-live-in ni Janette na si Jeorly Montes, isang construction worker sa Maynila, ang na­ga­nap na insidente. Dagdag ulat ni Ed Amoroso