2 journalist naipit  sa giyera, nailigtas

Matagumpay na nailigtas ng mga sundalo ang lima-katao kabilang ang dala­wang reporter makaraang maipit sa sagupaan ng mili­tar at ng rebeldeng Moro Islamic Liberation Front (MILF) sa bayan ng Datu Saudi Ampatuan, Maguin­danao.

Kinilala ang dalawang nailigtas na reporter na sina Ferdinand Cabrera, stringer ng GMA 7 at ang station man­ager ng Radio Minda­nao Network na si Bobong Calamba habang hindi naman natukoy sa ulat ang pangalan ng tatlong sibil­yang nasagip ng mga sun­dalo ng Army’s 64th Infantry Battalion sa bisinidad ng Barangay Dapiawan.

Sa ulat ni AFP-Eastern Mindanao Command (AFP-Eastmincom) spokesman Major Armand Rico, nagko-co­ver sa lugar ang mga reporter kasama ang tatlong iba pa nang ma-trap sa loob ng isang bahay ha­bang nag­ka­kaputukan ang mga sun­dalo at ang mga rebel­deng MILF.

Napag-alamang hindi ma­kalabas ang lima sa bahay na pinagtaguan sa ta­kot na tamaan ng ligaw na bala mula sa mga sniper ng MILF rebs.

Agad namang ipinag-utos ni Army’s 6th Infantry Division (ID) chief Major Gen. Ray­mundo Ferrer sa field unit com­manders nito na iligtas ang dalawang reporter at ang tatlong kasa­mang sibilyan.

Kaugnay nito, muli na­mang umapela ang militar sa mediamen na makipag-coordinate sa AFP at maging sa PNP upang hindi mapa­hamak sa paghahatid ng sariwang mga balita sa publiko. Joy Cantos