10 katao todas sa delubyo ng baha

KORONADAL CITY – Aabot sa sampu-katao, ka­bilang na ang 8 bata at isang 7-buwan na sanggol ang iniulat na namatay sa mag­kakahiwalay na sakuna sa bayan ng T’boli, South Co­tabato, ayon sa naantalang ulat kahapon.

Base sa pahayag ni Haydee Lacdoo, deputy provincial social welfare officer, limang batang mag-aaral ang nasawi sa landslide sa bahagi ng Brgy. Desawu noong Biyernes at isang mag-anak na binubuo ng lima-katao naman ang ti­na­ngay ng tubig-baha noong Sabado sa Brgy. Lamhaku sa nasabing bayan.

Kabilang sa mga nasa­wing mag-aaral matapos ang ilang oras na paghu­hukay ay nakilalang sina Malvin Tanon, 8; Jer­son Lamban, 8; Jemwel Haus, 9; Respy Haus, 6; at si Benjie Denyal, 5, pawang estud­yante ng Disawu Elementary School.

Naitala ang landslide bandang alas-4:30 ng ha­pon habang malakas ang buhos ng ulan noong Biyer­nes sa liblib na pook ng Sitio Lemluk-El sa Bgry. Desawu habang papauwi mula sa paaralan ang mga biktima.

Samantala, noong Sa­bado naman habang pata­wid ng ilog, akay-akay ng ina ang kanyang apat na anak nang big­lang bumulusok ang malakas na tubig-baha mula sa kabundukan patu­ngo sa ilog ng Barangay Lam­haku, T’boli, South Cotabato.

Ayon sa ulat, karga pa ng ina ang anak na 7-buwang gu­lang na sanggol habang nakabuntot ang 3 iba pang anak nang tangayin ng malakas na agos ng tubig habang tumatawid sa sapa.

Natagpuan naman ang mga bangkay ng limang mag-iina na nakalutang sa ilog ng Barangay Lambukay sa ba­ yan ng Banga, South Cota­bato noong Linggo ng hapon.

Kasalukuyan pa rin bine­neripika ang pagkikilanlan ng 5 mag-iina. (Boyet Jubelag at Joy Cantos)