Kawatan ng manok inutas

LEGAZPI CITY – Niratrat at napatay ang isang 35-anyos na lalaki makaraang maaktuhang nagnanakaw ng panabong na manok sa Barangay Gahit, Cataingan, Masbate kamakalawa ng gabi.

Nakilala ng pulisya ang napatay na si Marcelo Largado Jr., samantalang tumakas naman ang suspek na si Alfredo Monterde, 44, magsasaka at kapwa naninirahan sa nabanggit na barangay.

Ayon sa ulat ng pulisya, nagising ang suspek sa ingay ng alagang manok na nasa silong ng kanyang bahay at nang usisain nito ay namataang bitbit ng biktima ang panabong na manok.

Kaagad na kinuha ng suspek ang nakatagong baril at ipinutok sa biktima. (Ed Casulla)