16 nasagip sa prostitution

MALOLOS CITY, Bulacan – Aabot sa labing-anim na kababaihan kabilang na ang tatlong menor-de-edad ang naisalba ng mga awtoridad sa kamay ng sindikatong sangkot sa pandaigdig na human trafficking sa isinagawang magka­hi­walay na ope­rasyon sa Sitio Anibong, Barangay Dakila, Malolos City, Bulacan at San Fernando City, La Union noong Sabado ng gabi.

Pormal na kinasuhan ni P/Senior Supt. Allen Bantolo, ang mga suspek na sina Charlotte “Candy” Santarina y Castro ng Cabanatuan City; Benjamin Estrella y Manicad ng Guiguinto, Bulacan; Josephine Ocampo-Muli ng Tarlac City; Chai Gabon ng Caloocan City; Patricia Pinote at ang kanyang nakababatang kapatid na si Evangeline Pangilinan ng Brgy. Bangkal.

Ayon sa ulat, ilan sa mga biktima ay nagmula sa Metro Manila, Rizal, Laguna, Cavite, Batangas, Bicol, Pampanga, Nueva Ecija, Tarlac. Lima namang kababaihan ang naisalba mula sa sex den sa San Fernando City, La Union. (Dino Balabo)