Mga tindahan ng paputok natupok

CAMP VICENTE LIM, Laguna – Umaabot sa 26 tindahan sa pamilihang bayan ng Rosario, Cavite ang naabo sa bisperas ng Bagong Taon makaraang sumambulat ang mga na­kaimbak na paputok noong Lunes ng umaga.

Sa pahayag ni Rosario Deputy Fire Chief Nestor Calasan, nagsimula ang sunog sa mga tindahan ng paputok sa Rosario Public Market.

Sa inisyal na imbesti­gasyon, sa 26 tindahang nasunog, 20 dito ang tin­dahan ng paputok saman­talang 6 naman ang tindahan ng  sapatos.

Batay sa ulat, nakita ng batang si Jaidilyn Sagpao ang lumpong suspek na si Albert Espinosa na siyang nagtapon ng sigarilyo sa mga tindahan ng paputok na nagbunsod para sumiklab ang apoy at magputukan ang mga panindang paputok.

Pinabulaanan naman ito ni Espinosa at sa halip itinuro naman si Sagpao na siya namang naghagis ng pa­putok na “piccolo” sa isang tindahan na pinagmulan ng apoy.

Ipinag-utos naman ni Rosario Mayor Nonong Ri­cafrente, ang pagbabawal ng mga paputok sa bayan ng Rosario.

Wala namang naitalang nasawi o nasugatan sa na­ganap na sunog na umabot sa 2nd alarm, ayon kay Ca­lasan. (Arnell Ozaeta)

BULACAN

Samantala, aabot naman sa P10 milyong ari-arian ang tinupok ng apoy habang tatlo-katao naman ang iniulat na malubhang nasugatan makaraang sumabog ang may 20-tindahan ng paputok sa bayan ng Bocaue kaha­pon ng umaga. Ayon kay Fire Supt. Absalom Zipagan, Bulacan Fire Marshall, ka­bilang sa mga biktima ay sina Christopher Pineda at Ro­mualdo Malingit na pina­niniwalaang kawani ng GMA 7 television network bilang mga technical crew at security guard at si Rodel Ca­lupas, ahente ng mga pa­putok. Napag-alamang su­mabog ang isa sa mga tindahan ng paputok kung saan nadamay ang 20 tin­dahan sa Barangay Turo may 100-metro ang layo mula sa northbound exit ng Bocaue toll plaza ng North Luzon Expressway kahapon ng umaga. Umabot sa fourth alarm ang sunog kaya’t agad na sumaklolo ang iba pang bumbero sa mga kalapit na bayan at lungsod hanggang sa maapula ang apoy ban­dang alas-11:30 ng umaga. Ayon sa ulat nadamay din sa sunog ang apat sasakyan kabilang ang Toyota Innova (ZLX-499), SUV pickup (VAT-201) at 2-motorsiklong Ya­maha. Sa pahayag ng dating pangulo ng Philippine Pyrotechnics Manufacturers and Dealers Association Inc. na si Engineer Celso Cruz, ang allowable stocking limit ng mga paputok sa mga tin­dahan ay 25-kilo lamang at dapat ay may pagitang 15 metro kada tindahan. (Dino Balabo)