Bus vs jeepney: 3 todas

CAMP VICENTE LIM, Laguna  – Hindi na inabot ng Pasko ang tatlo-katao ma­karaang bumangga ang kanilang sasakyang pam­pa­saherong jeepney sa kasa­lubong na bus sa bayan ng Tagkawayan, Quezon noong Lunes ng hapon.

Kinilala ni P/Inspector Ge­miniano Danez, hepe ng  Tagkawayan PNP, ang mga biktimang nasawi na sina Erwin Ramos, 27, drayber ng AUV jeepney; Erlinda Realino, 54; at Ricardo De­cena, 52, pa­wang mga re­sidente ng Taytay, Rizal.

Samantala, ginagamot sa Tagkawayan Memorial Hospital sina Arman Rea­lino at Romeo Ilocario.

 Ayon sa report, bina­bagtas ng pampasaherong  bus na PP Bus Lines (HUJ-434) ni Redentor Pana ang kahabaan ng Quirino Highway sa Barangay San Francisco nang makasa­lubong ang AUV jeep (WGP-796) bandang alas-4 ng hapon. 

Dahil sa lakas ng impak, tumilapon pa ng ilang me­trong layo ang AUV at tu­mama sa bahay ni Romeo Ilocario na naging sanhi ng kanyang pagkakaospital dahil sa tinamong sugat sa braso. 

Agad na tumakas ang bus drayber na si Pana matapos ang aksidente pero sumuko rin sa pulisya may ilang oras  ang naka­lipas. (Arnell Ozaeta)