2 vendor bulagta

MABALACAT, Pam­panga  – Dalawang vendor ang iniulat na namatay habang isa pa ang ma­lubhang nasugatan maka­raang masagasaan ng pampasaherong bus sa national highway na sakop ng Dau spillway sa Ba­rangay Dau, Mabalacat, Pampanga kahapon ng madaling-araw.

Kinilala ni P/Chief Insp. Jovencio Flores, hepe ng Mabalacat PNP, ang dala­wang nasawi na sina George Florida Malasaga, 31 at Reynante Cuyos Villamor, 21, kapwa tindero at naninirahan sa Dau Ville sa Barangay Dau. 

Malubha naman si Ma­licio Albarillo Florida, 43, ng Dau Ville na ngayon ay ginagamot sa Ospital ng Angeles sa Angeles City, Pampanga.

Napag-alamang sakay ng dalawang bisekleta ang mga biktimang papauwi nang mahagip ng Five Star Bus Liner na may plakang TVZ-830 na mi­namaneho ni Carlito Villa­corta.

Ayon  sa ulat, patu­ngong Dagupan City ang nasabing bus nang hindi nakita ng drayber ang mga biktima dahil sa pagkasilaw sa kasalubong na sasak­yan.

Kasong reckless imprudence and serious physical injuries ang kinakaharap ngayon ni Villacorta sa sala ng Provincial Prosecurtor’s Office.