6 karnaper kalaboso
LA TRINIDAD, Benguet – Kalaboso ang binagsakan ng anim na kalalakihan makaraang maaktuhan ng mga awtoridad na kinakatay ang kinarnap nilang pampasaherong jeepney sa bayan ng Mabalacat, Pampanga kamakalawa ng gabi.
Kabilang sa mga suspek na kinasuhan habang nakakulong ay sina Johnny Batiil, Angel Alayugen, Kristen Balancod, Dario Pangilinan, Ronald Allan Rivera Jr., Jonie Cabusog na pawang taga-highland Cordillera region at bayan ng Mabalacat, Pampanga.
Ayon sa tagapagsalita ng Cordillera PNP na si P/Supt. Arni Emock, nagreklamo sa pulisya si Jackson Atiteo, na ang pampasaherong jeepney (AYM755) na pag-aari ni Roberto Dumagning ay kinarnap ng mga suspek sa KM 3 sa La Union noong Miyerkules ng Oktubre 31.
Dahil sa impormasyongg nakalap ng mga tauhan ni P/Chief Supt. Eugene Martin ng Regional Traffic Management Office sa CAR ay nakipag-ugnayan sila lahat ng opisina ng Traffic Management Group hanggang sa maaktuhan ang mga suspek na binabaklas ang kinarnap na sasakyan. (Artemio Dumlao at Myds Supnad)
- Latest
- Trending
