DND truck at bus nagsalpukan

Patay ang driver at pahinante ng isang delivery truck ng Arsenal ng Department of National Defense habang 13 pa ang malub­hang nasugatan nang sal­pukin ito ng isang pampa­saherong bus kahapon ng umaga sa Pilar, Bataan.

Nakilala ang mga nasawi na sina  Filbert Essel, driver ng truck at pahinante nitong si Gaspar Guerero na kapwa residente ng Tandang Sora, Quezon City.

Ginagamot naman sa Bataan General Hospital ang mga nasugatang biktima na karamihan ay pasahero ng Bataan Transit Bus.

Sinasabing binabagtas ng Bataan Transit bus ban­dang alas-8:00 ng umaga ang national highway sa Pilar nang unahan nito ang isa pang sasakyan na na­ging dahilan para sumalpok ito sa naturang delivery truck.

Wasak  at nahati ang ulo ng mini Izusu Forward na ang katawan ay tumilapon  sa bukid. Napag-alaman na maghahatid ito ng mga metal tool box sa arsenal nang maaksidente. (Jonie Capa­laran at Edwin Balasa)