Ambush: Misis ng pastor dedo, 3 pa sugatan

CAMP CRAME — Tinambangan at napatay ng mga rebeldeng New People’s Army (NPA) ang misis ng isang pastor habang sugatan naman ang tatlo pang sibilyan habang ang mga biktima ay naglalakad sa madilim na bahagi ng Malabog Paquibato District sa Davao City, kamakalawa.

Kinilala ng pulisya ang biktimang nasawi na si Juliet Abat, habang sugatan ang mister nitong si Pastor Noli Abat at ang mag-asawang Nino at Gina Ubag.

Ang mga biktima ay miyembro ng Ata Manobo Tribe at aktibong nakikipagtulungan sa tropa ng militar at pulisya sa pinalakas na kampanya ng gobyerno laban sa mga rebeldeng komunista.

Batay sa ulat, dakong alas-9 ng gabi habang naglalakad ang mga biktima sa naturang lugar nang tambangan ng mga rebelde kasapi ng Front Committee 52 at Pulang Bagani Command 1 sa pamumuno ni Leonardo Pitao, alyas Kumander Parago. (Joy Cantos)