3 todas, 2 pulis sugatan sa bakbakan

CAMP CRAME — Tatlo-katao kabilang na ang isang pulis ang iniulat na nasawi, samantalang dalawa pa ang malubhang nasugatan makaraang lusubin ng mga rebeldeng New People’s Army ang isang himpilan ng pulisya sa Barangay Baculin, Baganga, Davao Oriental, kamakalawa.

Kinilala ang nasawing pulis na si PO1 Jose Subron, habang ang dalawang napaslang na rebelde ay hindi naman nakilala matapos tangayin ng mga nagsitakas nilang kasamahan.

Ang dalawang pulis na nasugatan ay nakilala namang sina PO1 Jelson Malimbong at PO1 Arnulfo de la Peña.

Batay sa ulat, dakong alas-6:45 ng umaga nang salakayin ng mga rebelde ang Bacudin PNP outpost ng 1150th Provincial Police Mobile Group (PPMG) na matatagpuan sa Sitio Tanibak, Barangay Baculin, Baganga, Davao Oriental.

Sa kabila nang sorpresang pag-atake ay mabilis na nagdepensa ang mga pulis na nakipagbarilan sa sumusugod na mga rebelde hanggang sa magsi-atras ang NPA rebs patungo sa direksyon ng kagubatang sakop ng Barangay Balawan.

Ayon sa mga residente, habang papatakas ang mga rebelde ay nakita nilang binitbit ng mga ito ang dalawa sa kanilang namatay na kasamahan.

Naglunsad na ng hot pursuit operations ang pinagsanib na elemento ng Army’s 67th Infantry Battalion (IB), 1150th Provincial Police Mobile Group (PPMG) at pulis-Baganga laban sa grupo ng umatakeng mga rebelde. (Joy Cantos)