Rapist na ama, kalaboso

ORION, Bataan – Rehas na bakal sa himpilan ng pulisya ang kinabagsakan ng isang 48-anyos na ama na pinaniniwalaang naburyong makaraang halayin nito ang sariling anak na babae sa Barangay Bilolo sa bayan ng Orion, Bataan kamakalawa.

Pormal na sasampahan ng kaukulang kaso ang suspek na si Rustico Nallas y Custodio, 48 anyos, jobless at naninirahan sa nabanggit na barangay.

Ayon kay PO1 Randy Talento, hinalay ng suspek ang sariling anak na buntis sa kanilang bahay ganap na alas-11:00 ng tanghali.

Kinabukasan naman ay nag-amok ang suspek at pinagtataga ang kanyang anak na 19-anyos na si Mark Anthony, subalit nakaligtas at nakahingi ng saklolo sa mga kapitbahay, ayon pa sa pulisya. Napag-alamang nadiskubre ang krimen ng suspek laban sa sariling anak na babae matapos na maglakas-loob na ipagtapat ng babae sa pulisya. (Jonie Capalaran)