2 binata kalaboso sa pagnanakaw ng kable

CAVITE – Kalaboso ang kinabagsakan ng dalawa sa tatlong binata makaraang mahuli sa akto na nagnanakaw ng kable ng kuryente sa Aguinaldo Hi-way Brgy. Tubuan, Silang, Cavite kamakalawa. Kinilala ang mga naaresto na sina Jeffrey Lucban, 20, scraper, ng Brgy. Balubad 1st, Silang at Edgardo Barrios,18, binata habang pinaghahanap si Roberto Herrera Jr, 20, kapwa residente ng Brgy. Cupang, Muntinlupa City. Batay sa isinagawang imbestigasyon, ganap na alas-2:30 ng hapon nang mahuli sa akto ang mga suspek na nagnanakaw ng kable ng kuryente. Kaagad na nadakip ng mga rumespondeng pulis ang dalawa sa tatlong suspek na sina Jeffrey Lucban at Edgardo Barrios habang nakatakas si Herrera. (Lolit Yamsuan)