Negosyanteng Bumbay itinumba

CAMP SIMEON OLA, Legazpi City — Pinagbabaril hanggang sa mapatay ang isang 32-anyos na negosyanteng Bumbay ng mga di-kilalang suspek habang ito ay manininggil ng pautang sa bahaging sakop ng Barangay Buhatan, Sorsogon City kahapon ng umaga. Napuruhan sa katawan ang biktimang si Jan Wan Singn, 32, ng Barangay Piot ng nabanggit na lungsod.

Napag-alamang pababa ang biktima ng kanyang Mitsubishi Adventure (WHN-463) upang maningil ng pautang nang lapitan ng dalawang hindi kilalang lalaki at pinagbabaril. Matapos na paslangin ang biktima ay tinutukan ng baril ang misis at tinangay ang sasakyan ng mag-asawang trader. Narekober naman ang nasabing sasakyan sa bahaging sakop ng Magsaysay Street sa Sorsogon City matapos ang follow-up operation ng pulisya. (Ed Casulla)