11-anyos nakaligtas sa mga kidnaper

CAMP CRAME – Himalang nakaligtas sa mga kamay ng kidnaper ang isang 11-anyos na batang babae makaraang makahingi ng tulong sa isang traysikel drayber ang biktimang sapilitang ipinapasok sa sasakyan ng mga hindi kilalang lalaki sa Barangay Dahilayan, Manolo Fortich, Bukidnon kamakalawa. Nakilala ang biktimang si Jessa Mae Batlawon na mag-aaral ng Dahilayan Elementary School.

Ayon sa ulat, bandang alas-2:30 ng hapon habang papalabas ng nasabing eskuwelahan ang biktima ay hinablot ito ng isa sa mga kidnaper at sapilitang ipapasok sa nag-aabang na sasakyan. Aksidente namang may dumaang traysikel kaya nakahingi ng tulong ang biktima hanggang sa bitiwan ng mga kidnaper sa takot na madiskubre ang kanilang modus operandi.

Sa naging pahayag ng biktima, namataan niya ang isa pang batang may piring sa mga mata sa loob ng sasakyan ng mga kidnaper. Kasalukuyan namang inaalam ng pulisya kung may katotohanan ang binanggit ng biktima na isang menor-de-edad na hinihinalang dinukot din ng grupo. (Ulat ni Angie dela Cruz)