P.8-M sinikwat, sekyu pinatay

CAMP SIMEON OLA – Aabot sa P.8-milyon ang sinikwat ng mga hindi kilalang armadong kalalakihan bago binaril at napatay ang security guard makaraang pasukin ang bodega ng Coca-Cola Bottlers, Inc. sa Barangay Salvacion, Cataingan, Masbate kamakalawa ng gabi. Kinilala ng pulisya ang biktimang nasawi na si Artus Hermosa, 35, ng Sitio Crossing, Barangay Poblacion samantalang ang katiwala ng bodega na si William Bantiling Jr., ay ginagamot sa Cataingan District Hospital matapos barilin ng mga armadong lalaki. Ayon sa ulat ng pulisya, bandang alas-11:50 ng gabi matapos na samantalahin ng mga magnanakaw na pasukin ang nasabing bodega dahil sa kawalan ng serbisyo ng kuryente. Matagumpay naman natangay ng mga maninikwat ang nabanggit na halaga. (Ulat ni Ed Casulla)