Tsinoy trader nag-suicide

BATANGAS – Isang 50-anyos na mayamang Tsinoy trader ang iniulat na nagbaril sa sarili at namatay makaraang hindi makayanan ang matinding sakit na hika at pagkagumon sa alak sa kanilang bahay sa Barangay 18, Batangas City kamakalawa.

Hindi na umabot pa ng buhay sa St. Patrick Hospital and Medical Center ang biktimang si Ernesto Go, may-ari ng Formosa Commercial Center at pinakamalaking money changer sa nasabing lungsod. Ayon sa pulisya, bandang alas-7:30 ng umaga nang makarinig ng malakas na putok ng baril ang electrician nito mula sa ikatlong palapag ng bahay at nang puntahan ay duguang nakabulagta na ang biktima. (Ulat ni Arnell Ozaeta)