P1-M pabuya laban sa utol ng Lakas bet killer

GAPAN CITY, Nueva Ecija – Aabot sa P1 milyong pabuya ang inilaan ng lokal na pamahalaan ng Muñoz Science City sa dagliang ikadarakip ng mga killer ng isang negosyanteng utol ng Lakas bet at drayber nito noong Miyerkules, Marso 17, 2004.

Inaprubahan ng Sangguniang Panlungsod ng Science City of Muñoz ang resolusyon na magbibigay ng pabuya sa sinumang makapagtuturo sa mga pumaslang kina Engr. Roval Laurena at drayber nitong si Roland Diamante sa Barangay Mapangpang ng nasabing lungsod.

Napag-alaman pa na si Laurena ay kapatid ni Domiciano "Boy" Laurena, opisyal na kandidatong alkalde ng Muñoz, Science City sa ilalim ng partidong Lakas-CMD.

Sa panig naman ni Vice Guvernatorial candidate Noeme Manlapas ng Partido Demokratiko Sosyalista ng Pilipinas na may bahid pulitika ang pagkakapatay kay Engr. Laurena dahil sa nasisilip na malakas na kandidatong mayor si Domiciano sa nasabing lungsod. (Ulat ni Christian Ryan Sta. Ana)