BID binomba ng Abu

Camp AgUInaldo— Isang buntis ng ginang ang nasugatan matapos na sumabog ang itinanim na bomba ng mga bandidong Abu Sayyaf Group (ASG) sa harap ng tanggapan ng Bureau of Immigration and Deportation (BID) kamakalawa sa bayan ng Jolo, Sulu.

Ang nasugatang biktima ay nakilalang si Armida Elong, 24 na ngayo’y kasalukuyan ginagamot sa pinakamalapit na pagamutan dahil sa tinamong sugat sa ulo at kamay.

Batay sa ulat ni AFP-Southcom Chief Lt. Gen. Roy Kyamko, dakong ala-1 ng madaling araw nang maganap ang pagsabog sa harapan ng Bureau of Immigration Office sa bisinidad ng Marinos St,. Jolo, Sulu.

Ang nasabing bomba ay iniwan ng mga terorista sa nakaparadang traysikel sa harapan ng nasabing tanggapan at habang patakas ang nasabing mga kalalakihan ay umalingawngaw ang malakas na pagsabog.

Narekober naman ang mga nagrespondeng awtoridad sa pinangyarihan ng insidente ang mga shrapnel at 60 MM Mortar ammunitions.

Pinaniniwalaan namang ang nasabing pagpapasabog ay bahagi ng ‘sympathy attacks’ ng Sayyaf sa pagkakabitag ng militar sa kanilang pinunong si Ghalib Andang, alyas Commander Robot. Si Commander Robot na naputulan ng kaliwang binti ay sugatang nadakip ng tropa ng militar noong nakalipas na Disyembre 7, 2003 sa Indanan, Sulu.

Isinasailalim pa sa masusing imbestigasyon ng mga awtoridad ang nangyaring pagpapasabog. (Ulat ni Joy Cantos)