Misis tinodas ni mister bago nagbaril sa sarili

CABANATUAN CITY – Dahil sa ayaw ng mister na mamasukan sa Maynila ang kanyang misis ay nagawa nitong pagbabarilin hanggang sa mapatay ang asawa bago binoga ang sarili subalit himalang nakaligtas kamakalawa ng hapon sa Purok Matatag, Barangay Barrera, Cabanatuan City.

Nagtamo ng maraming tama ng bala ng baril ang biktimang si Resurreccion "Raquel" Paulino, samantalang nakikipaglaban naman kay Kamatayan ang asawang si June Paulino sa Dr. Paulino J. Garcia Hospital.

Lumalabas sa inisyal na imbestigasyon ni PO3 Fernando Tanghay, naitala ang insidente dakong alas-3 ng hapon matapos na komprontahin ng lalaki ang sariling misis tungkol sa pamamasukan nito ng trabaho sa Maynila.

Ayon pa sa ulat, pinakiusapan ng lalaki ang kanyang misis na manatili na lamang sa nasabing lungsod subalit matatag ang desisyon ng babae na umalis patungo ng Maynila hanggang sa maganap ang pamamaslang.

Tinangka naman mag-suicide ng lalaki subalit himalang nakaligtas at kasalukuyang nasa kritikal na kondisyon. (Ulat ni Christian Ryan Sta. Ana)