Lolo lasog sa tren

POLANGUI, Albay – Kalunos-lunos ang naging kamatayan ng isang 78-anyos na lolo makaraang mahagip ng tren habang tumatawid ang biktima sa riles na sakop ng Barangay Sugcad sa bayang ito kahapon ng umaga.

Nagkalasug-lasog ang katawan ni Ramon Jimenez, biyudo, matapos na suyurin ng tren bandang alas-9:50 ng umaga.

Tumigil naman ang tren na may body number 577 mula sa Maynila para asikasuhin ang bangkay at maipagbigay-alam ng pamilya.

Bago pa maganap ang pangyayari ay magtutungo ang biktima sa tindahan para bumili ng bigas at dahil sa mahina na ang pandinig nito ay hindi narinig ang rumaragasang at dagundong ng tren. (Ulat ni Ed Casulla)