Sekyu pinagbabaril ng adik

KAWIT CAVITE – Tadtad ng tama ng bala ang katawan ng isang security guard, makaraan itong pagbabarilin hanggang sa mapatay ng suspek habang ang biktima ay naglalakad pauwi sa Brgy. Panamitan ng bayang ito, kamakalawa ng gabi.

Ang biktimang agad na namatay ay nakilalang si Marcelo Pukawan ng Brgy. Panamitan ng bayan ding ito. Ang suspek na mabilis na tumakas tangay ang ginamit na baril ay nakilalang si Ernesto Rebullan, 26, binata residente ng 251 ng nasabi ring lugar.

Sa report ni SPO4 Margarito Alba, ganap na alas-7:30 ng gabi ng maganap ang insidente. Kasalukuyan umanong naglalakad pauwi ang biktima ng bigla na lamang itong pagbabarilin ng suspek.

Napag-alaman na mayroon ng alitan ang dalawa at nang muling magtagpo ang landas nito ay nauwi ito sa pagtatalo. Ito umano ang nagtulak upang tambangan ng suspek ang biktima habang papauwi.

Matapos ang pamamaril ay mabilis na tumakas ang suspek tangay ang hindi pa malamang kalibre ng baril na ginamit. (Ulat ni Cristina Go-Timbang)