Mayor itinumba sa Christmas party

Naging malagim na trahedya ang ginanap na Christmas party ng mga barangay opisyal makaraang pagbabarilin hanggang sa mapatay ang isang mayor ng nag-iisang killer habang nakikihalubilong kumain sa mga kaibigan kahapon ng umaga sa Surigao del Sur.

Kaagad na namatay si Taganaan, Surigao del Sur Mayor Victor Elipe, samantala, sina Casundo at Alejandro Jusian na kapwa barangay kagawad ng Azucena, Poblacion, Taganaan ay nasa kritikal na kondisyon dahil sa tinamong tama ng ligaw na bala sa katawan.

Sa inisyal na pagsisiyasat ng pulisya, naimbitahan si Mayor Elipe sa Christmas party ng mga barangay opisyal sa multi-purpose hall kaya pinaunlakan naman nito ang paanyaya.

Bandang alas-11:40 ng umaga habang nagsisikain ang mga bisita ay lumapit ang hindi kilalang lalaki sa biktima at binati ng Merry Christmas subalit sinabayan nito ng sunud-sunod na putok ng baril na ikinasawi ng mayor.

Nagkaroon ng tensyon sa loob ng party at nagpulasan ang ibang bisita at barangay opisyal upang umiwas sa ligaw na bala.

Sinamantala naman ng killer na tumakas at nakihalubilo sa pagpulasan ng mga tao.

May teorya ang pulisya na planado ang pagkakapaslang sa mayor at nangangalap ng impormasyon ang pulisya sa mga testigong nakakita sa mukha ng killer.(Ulat ni Danilo Garcia)