2 pulis nagtalo sa paradahan, isa patay

Dahil sa pagtatalo sa paradahan ng sasakyan ay naging ugat ng kamatayan ng isang bagitong pulis matapos na ratratin ng kanyang kabaro sa Junction Airport, Martinez Road, Sulu, Jolo kamakalawa ng umaga.

Binistay ng bala ng M-16 armalite ang biktimang si PO1 Abusuod Ali, samantala, ang suspek na kasalukuyang tinutugis ay nakilalang si PO1 Alhussin Alawan na kapwa nakatalaga sa Jolo Municipal police station.

Sa nakarating na ulat mula sa Camp Crame, naganap ang krimen bandang alas-9:15 ng umaga makaraang sitahin ng biktima ang ipinaradang sasakyan ng suspek sa gilid ng nabanggit na lugar.

Dahil sa bawal magparada sa naturang lugar ay pinaalis ni Ali ang sasakyan ng suspek hanggang sa magkaroon ng mainitang pagtatalo kaya napilitang umalis ngunit nagbantang babalikan ang biktima.

Ayon pa sa ulat, hindi nagtagal ay bumalik naman ang suspek na may dalang armalite at pinaputukan nga ang biktima hanggang sa mapatay. (Ulat ni Danilo Garcia)