Trike vs truck: 1 patay, 2 grabe

IMUS, Cavite — Isang 24-anyos na trike driver ang iniulat na nasawi habang malubhang nasugatan naman ang pasahero nitong mag-lola makaraang salpukin ng isang cargo truck ang minamanehong tricycle ng biktima sa kahabaan ng Aguinaldo highway sa Brgy. Palico ng bayang ito kahapon ng umaga.

Kinilala ng pulisya ang biktima na si Emmanuel dela Cruz, may asawa ng Progressive Village, Burol, Brgy. Molino, Bacoor, Cavite habang ang mag-lola na ginagamot sa Family Hospital ay kinilalang sina Soledad Villa Hermozo, 51 at apo nitong si Solicito Villa Hermozo, 15, estudyante ng Ipil Green Plain Subd., Brgy. Mambog, Bacoor, Cavite.

Samantala, mabilis namang nasakote ang suspek na driver ng cargo truck na may plakang BGX-534 ay kinilalang si Jose Ordoño, 41, ng Maginhawa St., Pag-ibig Town, Cainta, Rizal.

Sa pagsisiyasat ni SPO1 Wilfredo Cagalfin, may hawak ng kaso, naganap ang pangyayari bandang alas-7 ng umaga habang minamaneho ng biktimang nasawi ang kanyang trike na may plakang DT-1339 patungong palengke sakay ang mag-lola.

Nabatid pa sa ulat ng pulisya na nag-overtake ang cargo truck sa isang sasakyan subalit nakasalubong nito ang trike ng biktima na hindi kaagad nakaiwas. (Ulat ni Cristina Go-Timbang)